കർക്കിടക മാസത്തിലെ  കറുത്ത വാവിന്,  സൂര്യാസ്തമയത്തിനുശേഷമാണ് കാപ്പിരിക്കലശം നടത്തുന്നത്. കാപ്പിരിത്തറ നിലവിളക്ക്, പൂക്കൾ, കുരുത്തോല എന്നിവ കൊണ്ട് അലങ്കരിക്കും. കലശത്തിനുള്ള  നിവേദ്യങ്ങൾ കുടുംബാംഗങ്ങൾ തറവാട്ടടുക്കളയിൽ രുചിച്ചുനോക്കാതെയും, ചിലത് ഉപ്പ് ഇല്ലാതെയും  തയ്യാറാക്കുന്നു. വറുത്ത അരിയുടെ മുകളിൽ നാളികേരം വട്ടത്തിൽ കൊത്തി വച്ച്, അവൽ, മലർ, ശർക്കര, ചെറുപഴം, തേൻ, കരിക്ക്, പുട്ട്, അപ്പം, വട, പരിപ്പുവട, പപ്പടം, പരമ്പരാഗത രീതിയിൽ തേങ്ങ വറത്തരച്ചു വച്ച കോഴിയിറച്ചി, കോഴി പിടിയൻ, കരുവാട് (ഉണക്ക മീൻ വറുത്തത്), കള്ള്, ചുരുട്ട്, മുറുക്കാൻ (വെറ്റിലയും പാക്കും) എന്നിവയും നേദിക്കുന്നു. പൂജയ്ക്കും, ദീപാരാധനക്കും ശേഷം കുടുംബാംഗങ്ങൾക്ക് പ്രസാദമായി നിവേദ്യം വിതരണം ചെയ്യുന്നു.

അഷ്ടമംഗല വിധിപ്രകാരം കള്ളിനു പകരം കരിക്കും തേനും ആണ് ഇപ്പോൾ നേദിക്കുന്നത്.

പുതുതലമുറയിൽപ്പെട്ട കുടുംബാംഗങ്ങൾ മേൽ പറഞ്ഞ ആചാരങ്ങളുടെ പ്രാധാന്യം മനസ്സിലാക്കേണ്ടതും, കൃത്യനിഷ്ഠയോടെ പിന്തുടരേണ്ടതും ആകുന്നു.